Milugos sa 2 ka anak anaa na sa Mandaue City Jail
CEBU, Philippines - Gibalhin kagahapon ngadto sa bilanggoan sa Mandaue City Jail ang usa ka amahan nga gipasanginlang milugos sa duha niya ka anak dalagita kinsa nasikop sa kapolisan sa miaging adlaw.
Si SPO2 Juan Ondoy Calamba nga nahinabi sa Banat News miingon nga ang korte mihatag og higayon nga makapiyansa og P200,000 ang suspek alang sa unang kuwentada sa maong kaso , samtang walay gitugot nga piyansa sa ikaduhang kuwentada sa maong kaso nga giatubang niini.
Si SPO2 Calamba miingon nga ang 12 anyos nga biktima gitugyan ngadto sa buhatan sa Department of Social Welfare and Development (DSWD) 7 ug ang maguwang nga 14 anyos gipaubos sa pag-atiman sa iyang iyaan.
Dugang pa ni SPO2 Calamba nga ang laing anak nga lalaki sa maong suspetsado nga nagpanuigon pa og 10 ug 8 anyos ilang gitugyan ngadto sa ilang apohan.
Sa nasayran nga nahitabo ang pagpanglugos niadtong bulan sa Pebrero niining tuiga ug nabutyag kini niadtong Marso 15 niining tuiga.
Didto motug-an ang 14 anyos nga biktima sa iyang magtutudlo kinsa maoy naningkamot nga makaabot sa kapolisan ang maong kasayoran nga misangpot sa pagpasaka og kaso batok sa suspetsado.
Matud pa ni SPO2 Calamba nga niadtong bulan pa sa Hulyo migawas ang warrant of arrest sa korte nga maoy ilang gibasehan sa pagdakop sa maong suspetsado. (/WC)(BANATNEWS)
- Latest
- Trending
