1898— Gibuksan ang Malolos Convention sa Malolos, Bulacan. Kini human sa deklarasyon sa kaugalingnan sa Pilipinas gikan sa mga kamot sa Espanya niadtong Hunyo 12, 1898 ug ang paghimo niining usa ka dictatorial government ngadto na usab sa pagka- revolutionary government pagka-Hunyo 23 sa samang tuig.Ang Malolos Congress election gisugdan gikan Hunyo 23 ngadto na sa Septiyembre 10, 1898. Ug karong adlawa Septiyembre 15, sa tuig 1898 ang revolutionary congress nagtigom sa Barasoain Church sa Malolos, Bulacan.
Willy Messerschmitt
1978—Mitaliwan ang German aircraft engineer nga designer ug imbentor sa labing unang jet fighter nga gigamit sa aktwal nga giyera niadtong ikaduhang kalibutanong gubat nga si Willy Messerschmitt. Si Messerschmitt gipanganak niadtong Hunyo 26,1898 sa Frankfurt-am-Main. Nahimo siyang chief designer ug engineer sa Messerschmitt-Aitken-Gesellschaft niadtong 1938 nga maoy pabrika sa mga fighter planes sama sa gikahadlukang Me109 nga gigamit sa German Luftwaffe niadtong World War II. Siya usab ang midesinyo ug miimbento sa labing unang jet fighter nga gitawag kaniadto og Me262 niadtong naghinapos nga bahin sa giyera (1944) apan wala kaayo makapakita og dakong bentahe sa habig sa Germany ang maong abyon gumikan kay gamay ang produksyon niini ug pipila pa lang ka pilotong Germans ang makamaong mogamit niini.
Blue Baby
1964—Namatay ang Amerkanong surgeon nga si Alfred Blalock kinsa usa sa mitabang sa pagluwas ug pagtambal sa mga masusong gitawag og “blue baby” (tetralogy of fallot). Si Blalock ug pediatric cardiologist nga si Helen Tausig maoy mihimo sa labing unang operasyon alang sa maong matang sa pagpanambal sa bata pinaagi sa pag-opera sa kasingkasing sa bata diin buslotan ang duha ka dagkong ventricles sa kasingkasing.