CEBU, Philippines - Gitugyan ni Lapulapu City Mayor Paz Radaza ngadto sa kapolisan ang giingong illegal nga buy bust operation nga gilusad ni Basak Barangay Captain Isabelito Darnayla sa dakbayan sa Lapulapu didto sa maong barangay sa miaging semana.
Nagpasalamat ang mayor kang Darnayla tungod sa pagsumpo niini sa kalihukan sa illegal nga drugas sa iyang barangay, apan kinahanglan nga mosubay kini sa hustong pamaagi. Gipasusi ni Radaza kang Lapulapu City Police Office OIC Director P/SSupt. Rey Lyndon Lawas kung unsay kalapasan nga nahimo ni Darnayla aron kini makorehi-an. Si SSupt. Lawas mibutyag sa Banat News nga kun buy bust operation ang basehan ni Darnayla sa pagsikop kanila ni Fraidi Amestoso ug Roel Ceniza sa Sitio Caimitohan, sa barangay Basak sa milabay’ng semana, usa ka illegal ang maong lakang gumikan sa kapakyas sa kapitan sa pakig-alayon sa kapolisan ug sa taga PDEA7. Gipasabot ni SSupt. Lawas nga ang buy bust operation usa ka "planned operation" diin bugtong lamang ang PDEA ug kapolisan ang gihatagan og pagtugot nga mohimo sa ingon.
Gumikan niini manubag si Darnayla sa kasong ipasaka sa mga suspetsado ngadto kanila gumikan sa illegal nga pagpahigayon sa operasyon uban sa iyang mga sakop sa tanod sa maong barangay.
Kahinumdoman nga sa milabay’ng Sept. 6 sa hapon si Amistoso ug Ceniza gironda sa mga sakop sa tanod sa Brgy. Basak nga gipangulohan ni Darnayla ug nakasakmit sila og unom ka gagmay’ng pakete sa gituohang shabu ug ang buybust money. (BANAT NEWS)