CEBU, Philippines - Patay ang usa ka tawo nga gipusil sa ulo sa duha ka wala hiilhing lalaki nga nagsakay og motorsiklo sa dalan H. Abellana sa barangay Canduman, dakbayan sa Mandaue alas-6 pasado ang takna sa buntag kagahapon.
Ang biktima mao si Rodjen Lanusa Estremos, nagpuyo sa Upper Casili, dakbayan sa Mandaue ug habal-habal drayber sa maong dapit.
Si PO3 Rey Manatad sa kapolisan sa Presinto 6 sa Mandaue City Police Office (MCPO) miingon nga gikan naghatod sa iyang asawa sa trabahoan sa dakbayan sa Danao ang biktima dihang kini gipusil.
Sumala pa nga gisundan sa duha ka wala mailhing lalaking nagsuot og ski mask ug nag-jacket og itom sakay sa usa ka itom nga motorsiklo ug pag-abot sa nahitaboan gipusil kini.
Matud pang Manatad base sa pamahayag sa ilang mga nakahinabi gibanabanang nagpangidaron og kapin 20-anyos ug mubong tawo ang backrider nga mipusil sa ulo sa biktima.
Dihang nalamba na si Estremos giingong mikanaog ang gunman ug gitiwasan pagpusil ang kalawasan niini ug pagkahuman miikyas. Walay nakit-ang plaka sa motor ang mga saksi.
Apan sa pagsusi sa kapolisan pinangulohan ni Insp. Louie Alama sa Canduman Police Station diha sa balay ni Estremos nagduda sila sa pagkatawo niini tungod kay dunay armas nga .357 ug mga nagkalainlaing bala ingon man drug paraphernalia gikan sa balay niini.
Lakip sa nakapadugang sa pagduda mao ang gloves nga giingong dunay lama sa dugo. Samtang gisusi usab kun nganong magpangutana kini matag adlaw kung unsay mga banner reports sa mga pamantalaan ug masuko kung pangutan-on bahin niini. - (BANAT NEWS)