CEBU, Philippines - Mitahan ngadto ni Lapulapu City Mayor Paz Radaza ang katapusang binilanggo nga mieskapo sa karsel sa Station 3 sa kapolisan sa dakbayan sa Lapulapu niadtong Septiyembre 1 ning tuiga.
Ang mitahan mao si Benjamin Aparri Jr., 27, taga Brgy. Labangon dakbayan sa Sugbu nga may kasong robbery extortion.
Si Aparri miabot dinhi sa Sugbu kagahapon sa buntag gikan sa lalawigan sa Zamboanga human kini nagtagotago sulod sa usa ka semana human sa ilang pag-eskapo uban sa mga pinirisong sila si Junrey Iran, Alberto Torregosa ug Christopher Cernal.
Matud pa ni Aparri ang kamingaw sa iyang duha ka anak nga 7-anyos nga babaye ug 8-anyos nga lalaki maoy nakapaaghat kaniya sa pagtahan og balik sa balaod uban sa tambag sa iyang amahan.
Sumala pa niya nga nausab iyang hunahuna pagkadungog niya sa tingog sa iyang anak sa telepono.
Ang jailer nga si PO2 Jude Salazar niadtong tungora matud pang Aparri migawas ug nakahigayon sila pagguba sa rehas. Human niini mitago siya sa JM Basa St. sa dakbayan sa Sugbu ug ang uyab niya maoy mihatag kaniya og plete aron makasibat padulong sa Mindanao agi sa lungsod sa Oslob ngadto na sa Negros Oriental hangtud sa dakbayan sa Dapitan.
Si PO2 Salazar kasamtangang giimbestigar sa maong hitabo ug buot mangayo og pasaylo ni Aparri sa gidangatan sa maong polis. Hinuon gidawat sa maong polis ang pagpangayo og pasaylo ni Aparri ug mipadayag nga nagpaabot na lang siya sa silot kaniya.
(BANAT NEWS)