CEBU, Philippines – Nahulog sa mga kamot sa balaod ang usa ka gipasanginlang notadong drug pusher atol sa usa ka buybust operation sa kapolisan sa Mandaue sa sitio Santan, Brgy. Opao dakbayan sa Mandaue sa milabay’ng gabii.
Ang nasikop mao si Winston Demape, 36, residente sa maong dapit usa ka notadong drug pusher sa maong dapit kinsa nakuhaan og usa ka paketeng may sulod nga gidudahang shabu ug ang buybust money nga P200 sa kapolisan.
Ang mga sakop sa Station 5 sa kapolisan sa dakbayan sa Mandaue maoy mihimo sa maong buybust operation dihang nahibaw-an ang kalihukan niini.
Si Demape giisip nga usa sa labing idlas nga pusher sa maong dapit ug gikatakdang kasohan og kalapasan sa RA 9165 ubos sa Sec. 5 ug 11 sa Art. II.
Samtang usa ka 30-anyos nga lalaki ang nadakpan sa kinalit nga pagronda sa mga polis sa lungsod sa Consolacion diha sa sitio Libo sa barangay Tayud niadtong Miyerkules human makadawat og report ang mga awtoridad nga dunay nag-pot session sa maong dapit.
Kasong paglapas sa RA 9165 ang atubangon unya ni Richard Abucay, 30, kinsa nakuhaan og lima ka paketeng shabu diha sa maong operasyon.
Matud ni PO1 Ardien Balanay sa Consolacion Police Station dihang nahinabi sa Banat News usa ka concerned citizen ang mipahibawo kanila nga dunay nanuyop sa usa ka payag nga gipanag-iya sa usa ka naila lang sa pangalang Etad diha sa maong lugar. Apan pag-abot sa mga polis nakaikyas ang mga batan-on gawas lang kang Abucay kinsa daling nakuptan. (EIM) BANAT NEWS