CEBU, Philippines – Ang apo ni Kongresista Eduardo Gullas sa unang distrito sa probinsiya sa Sugbo nga si Samsam Gullas kinsa mokandidato isip kongresista puli sa iyang apohan sa umaabot elekisyon mipadayag sa iyang kahinangop kang Mayor Valdemar Chiong sa dakbayan sa Naga.
Niadtong Septiyembre 5, 2012 ang Naga nagsaulog sa ika-5th Charter Day ug si Chiong nagsaulog usab sa maong adlaw sa iyang 52-anyos nga adlaw’ng natawhan.
Ang kongresista wala makatambong sa maong kasaulogan samtang si Samsam usab kinsa dunay kakulian sa lawas ang wala usab makatambong apan nagpadala kini og mensahe ngadto kang Chiong.
Sa mensahe ni Samsam midayeg kini kang Mayor Chiong ug nagkanayon nga ang mayor sa dakbayan sa Naga maoy labing maayong mayor sa tibuok probinsiya sa Sugbo.
“In my humble opinion he is the best city mayor in the whole Cebu province”, tipik sa mensahe ni Samsam nga gibasa sa program host.
Si Samsam milakbit usab sa mga kalamboan kabahin sa mga proyekto ni Chiong sa Naga nga nahimong malampuson nga matud pa niya kung siya’y mahimong mayor iyahang sundon.
Sa laing bahin, atol sa charter day si Gobernador Gwendolyn Garcia uban sa iyang manghod nga si Kongresista Pablo John Garcia kinsa mokandidato isip gobernador sa probinsiya mitambong usab sa kasaulogan.
Ang gobernadora ug ang iyang manghud nahinangop kaayo sa gipasalig nga suporta ni Chiong ngadto kanila. Samtang ang gobernadora mipadayag usab kini sa iyang suporta ngadto sa Naga. (EIM) BANAT NEWS