CEBU, Philippines – Nabulit sa samad pinusilan ang patay’ng lawas sa usa ka giingong ex-convict nga gipusil sa duha ka lalaking nagmotor diin usa niini gituohang apo sa iyang napatay kaniadto.
Ang pagpamusil nahitabo sa bukirang bahin sa barangay Pawa lungsod sa Dumanjug niadtong Miyerkules sa alas 4:45 sa hapon dihang ang biktimang si Junie Gerodias,31, nagpungko sa usa ka culvert.
Si Gerodias niadto pang tuig 2010 nakagawas sa bilanggoan. Samtang duha ka mga lalaki ang gitumbok nga responsable sa krimen nga giilang sila si Roel Anyohan ug Rene Omaya.
Matod ni SPO2 Florencio Clarion sa Dumanjug Police Station dihang nahinabi sa Banat News nga dili pa dugay nakagawas sa tambalanan si Gerodias tungod kay napusilan kini niadtong Agosto 31 ning tuiga. Gituohang tungod kay wala maantimano sa unang pagsuway pagpatay kang Gerodias gibalikan kini niadtong Miyerkules sa gabii dihang nahibaw-ang nakagawas na kini sa tambalanan.
Ning higayona naantimano si Gerodias ug naigo ang walang bahin sa ulo niini ug miungot ang bala sa ibabaw nga bahin sa mata ug laing samad pinusilan sa dughan ug tuong kamot nga maoy nakaingon sa hinanali nga kamatayon niini.
Ang biktima nabilanggo kaniadto sa Cebu Provincial Detention and Rehabilitation Center (CPDRC) ug nakagawas niadto lang 2010 tungod sa kasong pagpatay sa apohan ni Anyohan. (EIM) BANAT NEWS