Paglawog sa Butanding ipahunong sulod sa tulo ka buwan

CEBU, Philippines – Gimando si Gob.Gwendolyn Garcia ang tulo ka buwan nga pagpaniid sa kahimtang sa mga butanding sa kadagatan sa lungsod sa Oslob tungod sa report nga nameligro na ang maong mga isda sa pagsige og pagpakaon sa mga turista ug anad na kaayo sila sa mga tawo.

Si Garcia mipatawag kagahapon og tigum sa kadagkoan sa Department of Environment and Natural Resources, Bureau of Fisheries and Aquatic Resources, Department of Tourism, Oslob Mayor Ronald Guarin ug ubang lokal nga opisyal lakip na sa mga mananagat.

Kini aron ipahibalong ang DENR may kamandoang ipahunong na ang paglawog sa maong mga isda, ang kinaon sa mga butanding o tuki mao ang uyap ug sukad nga naanad na silang lawgan boluntaryo nang moduol ang tuki sa mga mananagat.

Dako ang kabalaka sa mga eksperto nga tungod niini dili kalikayan nga manuol sila sa mga mananagat ug posibleng mapusposan sila aron abugon o ba kaha patyon.

Nagtoo hinuon si Garcia nga nagkadaghan ang mga mananap sa kadagatan sa lungsod sa Oslob gumikan kay daghang makaon sa lugar ug luwas ang ilang kahimtang.

“It’s a basic survival instinct, they feel protected, they feel safe dinha sa Tan-awan (Oslob),” nagkanayon si Garcia kinsa dili buot maapektahan ang turismo sa maong lungsod. (EIM) BANAT NEWS