Nitulis sa 12-anyos, nadakpan sa kapolisan

CEBU, Philippines — Nadakpan ang usa ka notadong tulisan nga nanion og armas ug nitulis sa 12 anyos nga batang babaye diha sa Hervas sa Barangay Dumlog, Dakbayan sa Talisay alas 4:12 sa hapon niadtong Huwebes.

Ang suspek nga nadakpan mao si John Laurence Limutan Padigos, 26, taga Purok Durian, Lower Caduldulan, Barangay Lawaan 3 sa nahisgutang siyudad.

Sa inisyal nga imbestigasyon sa kapolisan nasuta nga naglakaw ang biktima sa dapit ug naagian sa suspetsado.

Gihunongan niini ang bata ug dayon gitionan og armas ug gikuha ang iyang cellphone nga nagkantidad og P5 mil.

Sa pag-review sa CCTV footage nailhan ang suspek hinungdan sa paghimo sa follow up operation. Nadakpan ang suspek diin narekober ang motorsiklo nga gigamit sa krimen ug .45 kalibre nga pusil.

Matud pa ni Police Lt. Col. Epream Paguyod, hepe sa kapolisan sa Talisay nga wala pa nila mabawi ang cellphone kay giingon nga giprenda kini sa suspek.  IBM BANAT NEWS