CEBU, Philippines – Gihangop sa kapolisan ang pakigtambayayong sa ubang mga ahensya sa kagamhanan uban sa pribadong sektor sa pagsaulog nila sa ika-18 nga Crime Prevention Week. Sa Kapihan sa PIA kagahapon nga gipalanog sa DYMR, gibutyag ni manlalaban Risty Sibay sa National Police Commission nga misalig sila nga pinaagi sa abag sa lokal nga kagamhanan dili mapakyas ang ilang gilauman nga padayong pag-us-os sa kriminalidad dinhi sa rehiyon ilabi na dinhi sa Sugbo.
Matud pa niya nga base sa estatistika sa kapolisan dinhi sa rehiyon, nasuta nga mikibra ang gidaghanon sa krimen dinhi sa dakbayan sa Sugbo, sa palibot sa lalawigan ug sa katibuk-ang Central Visayas sa unang walo ka buwan niining tuiga itandi sa susamang periodo sa miaging tuig.
Nasayud siya nga bunga kini sa kooperasyon sa mga molupyo sa pagpanguna sa lokal nga kagamhanan. BANAT NEWS