SSS mikolekta'g P46 bilyones

CEBU, Philippines - Ang Social Security System (SSS) nakakolekta og kinatibuk-ang P46.68 bilyones nga kontribusyon gikan sa mga membro niini atol sa unang katunga niining tuiga nga labaw og siyam ka porsyento itandi sa P42.72 bilyones lang sa susamang periodo sa tuig 2011. Sumala pa ni SSS President and Chief Executive Officer Emillio de Quiros, Jr. nga ang 39 ka porsiyento sa kinatibuk-an niini nagagikan sa Over-the Counter (OTC) nga bayad sa SSS-accredited banks diin mikabat sa P18.12 bilyones ang katibuk-ang nakolekta niini sa unang unom ka bulan sa tuig 2012.

Sa iyang pamahayag atol sa bisperas sa ika-55 nga kasaulogan sa SSS sa tibuok nasud, si De Quiros miingon nga ang ubang naandang nangolekta sa mga bayad sa membro sa SSS mao ang mga SSS branch teller ug ang SSSNet , ang modernong collection channel sa mga amot gikan sa membro sa SSS.

Ang premiums gikan sa mga kawani ug household helper atol sa unang tunga sa tuig sa 2012 mikabat sa P40.66 bilyones labaw og siyam ka porsiyento itandi sa P37.23 bilyones koleksyon sa susamang periodo sa miaging tuig 2011.

Samtang ang kontribusyon nga giremit gikan sa Overseas Filipino Workers (OFW) misaka og 14 porsiyento nga may gidak-ong P1.25 bilyones samtang ang kontribusyon gikan sa mga self-employed member sama sa mga negosyante, professional, informal sector worker, mag-uuma ug mangingisda misaka usab ngadto sa unom ka porsiyento nga may kinatibuk-ang P2.5 bilyones gikan sa Enero hangtud sa Hulyo 2012.

Sa samang higayon giawhag ni de Quiros ang mga membro sa pag-enroll sa website sa SSS nga www.sss.gov.ph. aron makakuha og access sa mga rekord sama sa membership data ug mga kontribusyon nga gimantala lamang sa ilang website ug nga ang mga rehistradong tiggamitan na sa ilang website makahimo na og transaksyon sa SSS nga maglakip sa aplikasyon sa loan ug maternity notification.

Pinaagi sa paghatag sa mga membro og open access sa ilang rekord sa website, mahimo na nilang mamonitor ang mga makita nilang sayop ug makakonsulta dayon sila niini ngadto sa buhatan sa SSS alang sa pagtanos sa ilang rekord. (Liezl M. Frasno-Correspondent/WC) (BANAT)