CEBU, Philippines – Patay ang usa ka mag-uuma human kini gitabangan og gulgol ang liog gamit ang sanggot sa duha ka lalaking nanulong niya sa umahan sa bukirang bahin sa barangay Captain Claudio siyudad sa Toledo niadtong Domingo sa alas 6:00 sa gabii.
Ang biktima nga wala na makaabot nga buhi sa tambalanan mao si Silverio Aleser, nagpuyo sa sitio Gingkamote sakop sa maong barangay.
Samtang ang duha ka mga suspek mao sila si Teody Risane ug Diosdado Cabiles alyas Jake, nagpuyo usab sa maong lugar.
Matud ni SPO4 Carmelito Hornales, desk officer sa Toledo City Police dihang nahinabi sa Banat News ang amahan sa biktima nga si Martin didto sa balay sa higala dili layo sa nahitaboan dihang iyang nakita ang anak nga nagdagan ug nagkadugo ug nagpangayo og tabang.
Pag-abot niini sa iyang duol natumba ang iyang anak sa yuta ug nakita niya nga gigulgol ang liog niini tungod sa dakong samad ug wala magdugay miabot usab ang duha ka suspek nga mao diay migukod sa biktima nga nagdala og sanggot ug sundang ang usa.
Matud pa ni Hornales, imbes nga mahadlok sa ilang gibuhat gibaharan pa sa duha ang amahan sa ilang gipatay sa pag-ingon: “Molaban ka noy?,”dayong sibat pahilayo sa lugar.
Sila si Insp. Jaime Tolentino ug mga kaubanan pag-abot sa crime scene patay na ang biktima.
Sa paghimo ning balita padayun ang hot pursuit operation sa kapulisan ug padayon pa sab ang pakisusi pagtumbok sa motibo sa krimen. (EIM) BANAT NEWS