CEBU, Philippines – Ang Social Security System (SSS) mosalig sa mga paryente, higala, ug mga silingan sa mga biyuda sa membro sa SSS pagpahibawo sa maong buhatan sa higayong magminyo og laing lalaki ang hingtungdan inigka-biyuda niini.
Mao kini ang gibutyag ni Assistant Vice President Helen Solito sa SSS Central Visayas sa mga tigbalita kalabot sa maong isyu.
Nasayran nga ang modawat sa pension sa usa ka membro sa SSS nga lalaki nga mamatay, mao ang iyang biyuda, ug ang biyudo kun ang membro sa SSS usa ka babaye.
Matud pa ni Solito nga sa higayon nga magminyo ang mahabiling biyuda o kaha biyudo, diha-diha maputol usab ang pension nga iyang gidawat.
Apan matud pa ni Solito nga kun sila lang mga taga SSS maoy saligan sa pag-monitor niini maglisud sila tungod kay kuwang sila og tawo.
Busa ila na lang isandig sa mga paryente, higala ug mga silingan sa mga hingtungdan nga maoy mo-report sa ilang buhatan una pa sila makahimo og tukmang lakang aron maimbistigar ang hingtungdan.
Miingon si Solito nga kun ilang mamatud-an diha-diha putlon dayon nila ang maong pension.
Midugang siya nga daghan na ang maong mga kaso nga ilang nahatagan og action pinaagi sa pagputol sa nahisgutang pension ug nagpasalamat sila sa mga nagpakabana sa pagtabang sa ilang buhatan aron makahimo og lakang batok sa mga malapason.
Hinuon matud pa niya nga kun wala’y maka-report sa ilang buhatan magpadayon gayud pagdawat ang usa ka biyuda kinsa magminyo pag-usab o bisan magpuyo-puyo lang ug ingon man ang biyudo.
Niining maong isyu, daku kaayo og kalabtanan ang publiko aron makatabang sa SSS sa pagmonitor sa mga malapason, sumala ni Solito. - BANAT NEWS