CEBU, Philippines – Dako ang pagduda ni Lapulapu Police Chief Rey Lyndon Lawas nga gituyo sa pagpagawas ang upat ka piniriso nga nakapuga niadtong Sabado sa buntag didto sa Police Station 3 nga nahimutang sa merkado publiko sa maong syudad.
Sa pakighinabi sa Banat News ni Lawas iyang gihinganlan ang mga piniriso nga sila si Albert Torregoza, 24, Christopher Cernal, 20, Junry Iran, 21 ug Benjamin Aparri Jr., 27 kinsa matud pa niya nga may mipagawas kanila og tuyo.
Matud pa niya nga gikontak na nila ang mga ginikanan nila ni Iran ug Aparri aron hangyoon nga motahan na lang sila sa kapolisan aron dili mosamot kadako ang kaso nga ilang atubangon.
Dugang pa ni Lawas nga aduna nay team usab nga tua sa usa ka lungsod aron ipatuman ang manhunt operation batok sa duha ka pugante. Gibutyag ni Lawas nga iya man unta nga gisusi ang prisohan sa maong lugar nga iyang gihulagway nga lig-on kaayo busa kadudahan kaayo nganong nakapuga ang maong mga piniriso.
Gihulagway usab ni Lawas nga ang pagbiya ni PO2 Jude Salazar sa prisohan nga maoy hinungdan nga nakagawas ang maong mga piniriso usa ka dakong kalapasan. Dugang pa ni Lawas nga tungod sa maong insidenti aduna na siyay himoong ‘drastic measure’ sa iyang kapolisan.
Kahinumdoman nga nakugang na lang ang kaubanan nilang Salazar dihang nawagtang na ang ilang mga piniriso.
Maayo na lang kay sila si Torregoza ug Cernal namalik sa prisohan kay igo lang silang miduaw sa ilang tagsa-tagsa ka panimalay. Sa pagkakaron padayon pa ang manhunt operation sa kapolisan sa mga pugante. (WC) BANAT NEWS