CEBU, Philippines – Upat ka mga priso sa Presinto 3 sa Lapulapu City Police Office (LLCPO) ang nakaeskapo apan gidemalas ang duha tungod kay nadakpan sila pagbalik ug gipaslak og laing prisohan.
Si PO2 Ruel Pelones sa nahisgotang presinto sa kapolisan miila sa mga nakaeskapo mao sila si Junrey Iran, 29, taga sitio Paradise sa barangay Pajo sa maong dakbayan nga nag-atubang og kaso nga pagpangawat.
Ang ikaduha nga mieskapo mao si Christopher Cernal, 20, taga barangay Calawisan nga nag-atubang og kasong physical injuries ug kalapasan sa Republic Act 9282; Albert Estoregosa, 24, taga barangay Alegria, lungsod sa Cordova nga nag-atubang og kaso nga shoplifting ug Benjamin Aparri Jr., 27, taga barangay Babag sa maong dakbayan nga nag-atubang og kaso nga robbery ug extortion.
Ang tulo gibilanggo sa detention cell nga nahimutang sa merkado publiko sa barangay Poblacion apan nakahimo sa pagguba sa rehas ug nakagawas.
Si Pelones miingon nga si SPO1 Joseph Andrin maoy nakadiskubre sa pag-eskapo sa maong mga binilanggo alas-8 pasado na sa miaging gabii. Gikatakdang imbestigaron usab ang jailer sa mga priso nga si PO2 Jude Saladaga tungod sa insidente.
Sa gihimong hot pursuit operation nadakpan pagbalik sila si Cernal ug Estoragosa nga midiretso lang og uli sa ilang mga balay.
Ang duha mitug-an nga gisikaran sa ilang kauban ang rehas nga puthaw ug naguba kini maong sila nakagawas. Ang kapolisan padayon pa sa pagpangita sa nahibiling pugante. (R/EIM) BANAT NEWS