Hinabang sa gibahaan sa Luzon nag-abot-abot

CEBU, Philippines - Nag-abot abot ang mga natigom nga hinabang alang sa mga biktima sa baha sa Luzon sa gipasiugdahang relief operations sa Regional Development Council (RDC) 7 Task Force (TF) Tabang. 

Atol sa senemanang panagtigom sa mga sakop sa TF Tabang, ang probinsya sa Sugbu mitampo og duha ka 20-footer container vans nga relief goods ug gipadala na sa probinsya sa Laguna.

Laing 20-footer van gihapon ang gipadala sa probinsya ngadto sa National Disaster Risk Reduction Management Council (NDRRMC) nga gipaagi kang Department of Social Welfare and Development Secretary Dinky Soliman.

Ang Cebu Chamber of Commerce and Industry sa laing bahin nakakolekta og hinabang gikan sa mga miyembro niini ug donasyon nga P47,000 ug may gipaabot pa silang dugang P100,000 ug mga relief goods.

Ang Department of Budget and Management (DBM)-7 nakakolekta og P3,100 gikan sa ilang mga empleyado ug usab relief goods samtang ang mga kawani sa National Economic Development Authority (NEDA)-7 mitampo usab og P1,250 ug relief goods.

Ang Cebu Port Authority mitampo og P16, 000 ug relief goods samtang ang DSWD)-7 nga gitahasang mangolekta niini mibutyag nga ang syudad sa Bayawan Negros Oriental mihatag og P500,000 nga pinansyal nga hinabang nga direktang gideposito ngadto sa DSWD- account gawas sa P17,300 nga kantidad sa donasyon nga nakolekta sa DSWD-7 alang sa susama ra usab nga katuyuan.

Ang Toledo City misaad usab og P1milyong pinansyal nga hinabang nga ipaagi sa TF Tabang. Mahimong makatampo og hinabang pinaagi sa pagbilin niini diha sa mga police stations. ( /EIM)   - BANAT NEWS