CEBU, Philippines - Gibulit sa samad pinusilan sa ulo ug lawas ang 32- anyos nga negosyante sa gidudahang drayber sa motorsiklong iyang gisakyan sa libon nga bahin sa bukirang barangay sa Ablayon lungsod sa Dalaguete alas 11:30 sa miaging gabii.
Ang biktima nga patay dihadiha mao si Joebert Elhig, 32, nagpuyo sa sitio Mag-alambak, barangay Mantalongon, Dalaguete ug dunay tindahan sa merkado sa Mantalongon.
Samtang ang suspek gihulagway lang nga duha ka mga lalaki nga nagsuot og jacket ug kasarangan lang ang pamanit ug pamarug. Matud ni SPO1 Veronico Centibo sa Dalaguete Police dihang nahinabi sa Banat News kauban sa biktima ang usa ka Silvano Cartilla, nangadto sa disko sa silingang barangay sa Dumalan tungod kay pista.
Apan samtang didto na sila sa diskohan nakakita sila og duha ka lalaki nga ilang nahimamat og naamigo hangtud nga nagkasinabot nga manglakaw gamit ang motorsiklo sa mga gikatahapan.
Sumala pa nga ang upat nag-angkasay sa motor apan samtang didto na sila sa mingaw nga lugar mihangyo si Silvano pagpahunong sa motor tungod kay kaihion na kini kaayo.
Apan kalit lang nadunggan ni Cartilla ang nagsunod nga buto sa armas ug paglingi niya natumba na ang biktima ug sa iyang kahadlok miambak siya og lahos sa walog ug wala maigo sa pagpusil kaniya sa duha ka lalaki.
Naabtan sa mga polis ang biktima nga nagbuy-od na ug nabulit og samad pinusilan sa lawas. Padayon pang gisusi ang motibo sa krimen. (/EIM) - BANAT NEWS