CEBU, Philippines - Kritikal ang kahimtang sa usa ka PUJ driver kinsa gipusil sa iyang silingan didto sa Poblacion Oriental sa lungsod sa Consolacion sa miaging hapon.
Ang biktima mao si Carlito Gaviola, 45, minyo nga nagpuyo sa sitio Sta Cruz, sa barangay Jagobiao sa dakbayan sa Mandaue, ug drayber sa 25B nga multicab nga pasaheroan nga nagbiyahian sa Talamban sa dakbayan sa Sugbo ug lungsod sa Liloan.
Samtang ang suspetsado nga nadakpan usab dayon mao si Jovencito Canoy, minyo, ug hingkod, nga silingan ra usab sa biktima sa barangay Jagobiao sa dakbayan sa Mandaue.
Si PO1 Noel Bonero sa kapolisan sa lungsod sa Consolacion nga nahinabi sa Banat News miingon nga puno sa pasahero ang PUJ nga gimaneho sa biktima gikan sa Talamban nga gikonduktoran usab sa iyang asawa paingon sa lungsod sa Liloan.
Pag-abot sa barangay Poblacion Oriental sa dalan national sa lungsod sa Consolacion mihunong kini kay nanaog ang usa ka pasahero.
Apan ang suspetsado kinsa gituohang nag-atang na daan miduol sa biktima ug gidul-itan pagpusil ang aping niini.
Matud pa ni PO1 Bonero nga gumikan sa kahadlok nangambak ang mga pasahero ug nag-iyahay og panagan pahilayo sa sakyanan.
Dugang pa ni PO1 Bonero nga samtang gitabang sa asawa ang iyang bana, mihana ang suspetsado og pusil kaniya apan tungod kay daghang mga tawo ang nagdinagay paduol sa nahitaboan midagan ang suspetsado pahilayo sa maong lugar.
Ang biktima didto ihatud sa Eversely Child Sanitarium General Hospital sa barangay Jagobiao apan gibalhin kini sa Vicente Sotto Memorial Medical Center sa dakbayan sa Sugbo.
Si PO1 Monero miingon nga tungod kay nailhan sa asawa sa biktima ang suspetsado nga silingan lamang usab nila, nangayo kini og panabang sa kapolisan sa Presinto 3 sa Mandaue City Police Office kinsa mipahigayon usab dayon og hot pursuit operation nga maoy hinungdan sa pagkasikop sa suspetsado didto sa balay niini.
Matud pa ni PO1 Bonero nga pagdumot ang hinungdan sa maong pagpamusil sa suspetsado tungod kay nasumbagan man kini sa biktima niadtong miaging bulan gumikan sa pagbinastos niini sa anak sa biktima. (BANAT NEWS)