CEBU, Philippines - Andam na ang tolda nga kabalhinan sa mga empleyado sa Bureau of Customs (BOC) Port of Cebu sumala pa ni Sub-Port of Mactan Collector Paul Alcazaren.
Matud pa ni Alcazaren nga iya nang nasuta ang presyo sa tent nga ilang gamiton aron mahimong kasamtangang opisina sa BOC sa Sugbo.
Ang BOC moabang og P13 mil matag buwan sa maong mga tolda.
Miingon si Alcazaren nga usa ka pribado nga negosyante ang ilang gikuhaan sa maong mga tolda aron kalikayan ang isyu sa politika.
Gikabalak-an lang sa mga kawani sa BOC kung mahinayon ang ilang pagbalhin ngadto sa karaan nga building sa BOC nga nahimutang sa Port San Pedro kay basin dili magkadimao ang ilang mga papeles sa matag adlaw nga transaksiyon.
Sa pagkakaron gipaabot nalang ni BOC Collector Ronnie Silvestre ang tubag sa Cebu Port Authority (CPA) sa ilang hangyo nga lugwayan unta kutob sa Disyembre ning tuiga ang ilang pag-ukopar sa BOC building sulod sa Cebu International Port. (BANAT NEWS)