Dinasmagay sa motorsiklo 2 ang naangol

CEBU, Philippines - Pulos naangol ang duha ka magsuong bayong-bayong human sa dinasmagay sa ilang gisakyang motorsiklo ug sa kasugat niining laing motorsiklo didto sa Paras St., barangay Poblacion, lungsod sa Barili sa miaging gabii. Ang mga biktima mao si Junrey Albeso, 17, nga maoy nagmaneho sa ilang motorsiklo, ug ang angkas niyang manghud nga si Roberto Albeso,14 anyos ug mga molupyo sa barangay Maigang, Barili.

Samtang si Junfe Ambrad, 20, ulitawo, nga maoy kasugat nila, wala’y lisensiya sa pagmaneho nga taga barangay Balaw, Barili, wala maunsa.

Si PO1 Richard Cababat, imbistigador sa Barili Police   Station mibutyag sa Banat News nga ang motorsiklo nga gisakyan sa managsuong biktima nagpaingon sa highway sa Poblacion dihang gikasugat nila ang motor ni Ambrad.

Ang imbistigasyon sa kapolisan nagbutyag nga mikawat sa pikas lane sa karsada ang motorsiklo sa managsuon nga maoy nakaingon sa dinasmagay.

Gumikan kay pulos kusog ang ilang pagpadagan, pulos nasalibay ang mga biktima ug dihang mitugpa sila sa batoon nga lugar nasamad, nabun-og ug nangabali ang kabukogan nila sa kalawasan. (BANAT NEWS)