CEBU, Philippines - Gigahinan na sa Department of Transportation and Communications (DOTC) balor og P975 milyones ang gitinguhang Bus Rapid Transit (BRT) System sa dakbayan sa Sugbo.
Kini nalakip sa giduso nga 2013 budget sa DOTC balor og P32.7 milyones nga anaa karon sa House Committee on Appropriations.
Ang gahin alang sa BRT System kabahin kini sa mga proyekto sa DOTC nga may ayuda gikan sa langyaw’ng pundo balor og P7.879 bilyones. Ang Cebu City BRT Corridor Project Phase 1 gisusi na sa National Economic Development Authority Infrastructure Staff sa Manila. Gikonsiderar sa DOTC ang BRT nga labing sayon nga paagi nga mahapsay ang transportasyon sa dakbayan sa Sugbo hulip sa daghang mga public utility jeepneys (PUJ).
Hayan palapdan pa ang BRT System ngadto sa mga kasikbit nga syudad ug kalungsuran sa Metro Cebu.
Niadtong 2009, ang World Bank nitahas sa Integrated Transport Planning Limited (ITP) sa pagpahigayon og pagtuon sa BRT alang sa dakbayan sa Sugbo.
Ang resulta sa pagtoon nakakuha og suporta gikan sa kagamhanan sa dakbayan sa Sugbo. ( /EIM) - BANAT NEWS