Capitol mokita og P200 mil nga abang sa Larsian

CEBU, Philippines - Nalantawan nga mokita ang lalawigan sa Sugbo og gibana-banang P200 mil matag bulan gikan sa 25 ka mga stall sa bag-ong gitukod sa kagamhanan sa lalawigan nga Larsian sa may Fuente Osmeña ning siyudad sa Sugbo.

Sumala pa ni Provincial Planning and Development Office (PPDO) Chief, Engr. Adolfo Quiroga, nga ang 25 ka mga stall holder maoy labing unang hut-ong sa mga makaangkon sa mga stall sa Larsian human sa ripa nga gipahigayon sa Kapitolyo sa miaging buwan.

Sigun pa ni Quiroga nga nasabotan na sa   mga vendor ug ni Governor Gwendolyn Garcia nga mag-abang sila og tag P2 matag square meter sa ilang giukopar nga luna sa palibot sa Fuente Osmeña

Nasayran nga anaa sa 1,500.00 hangtud sa , 1,750.00 ka metro kuwadrado ang giukopahan sa mga vendor busa sa tag P2 matag metro kuwadrado, hayan nga mokita ang kagamhanan sa lalawigan og P200 mil kapin kun kulang matag buwan pinaagi sa abang.

Matud pa ni Quiroga nga mas motaas pa unya ang kitaon sa kagamhanan niini sa higayon nga maokupa ang tanang mga stall sa Larsian.

Gipahibawo ni Quiroga nga ang bag-ong Larsian karon may 49 ka mga barbeque stall, 10 ka fruit stall ug 3 ka souvenir stall.

Sa nasayran nga ang kagamhanan sa lalawigan sa Sugbo migahin og kapin sa P11 milyones sa pag-renovate sa Larsian aron mahimo usab kini nga tourist attraction dinhi sa siyudad ug sa lalawigan sa Sugbo. ( /WC) - BANAT NEWS