Sunog miigo sa Keppel Engineering

CEBU, Philippines - Ang kaitom sa aso sa sulod sa usa sa mga edipisyo sa Keppel Engineering sa barangay Looc, dakbayan sa Lapulapu maoy nakapaalarma sa mga bombero   ug mipadagan sa ilang mga fire truck sa pagpawong sa miulbong sunog sa alas 8:49 kagahapon sa buntag.

Si FO1 Jay Joseph Payot sa Bureau of Fire Protection sa maong dakbayan nga nahinabi sa Banat News miingon nga iyang gipaubos sa First Alarm ang maong sunog nga nagsugod sa giwelding nga bahin sa edipisyo sa maong dapit. Dugang pa ni FO1 Payot nga nakontrol nila ang kayo sa alas 9:21 sa buntag ug wala kini makatapon sa lain pang edipisyo sa maong kompaniya.

Gipasabot niya nga sa sinugdan nakuyawan ang katawhan sa kaitom sa aso sa sulod sa edipisyo nga gigikanan niini. Nasuta nila nga ang nakapalagom sa aso mao ang nasunog nga mga biya nga goma nga didto sa palibot sa edipisyo.Si FO1 Payot miingon nga wala pa nila matataw ang katibuk-ang danyos sa maong sunog sanglit padayon pa nilang   gisusi   ang maong hitabo. ( /WC) - BANAT NEWS