CEBU, Philippines - Kritikal ang kahimtang sa usa ka manager sa usa ka lending firm human kini gipusil sa tulo ka mga lalaking nagsakay og motorsiklo sa barangay Mantayupan sa lungsod sa Barili kagahapon sa alas 2:00 sa kaadlawon.
Ang biktima mao si Sherwin Baricuatro delos Reyes, 33, branch manager sa CHN Global Lending Firm nga nahimutang sa barangay Poblacion sa maong lungsod.
Matud ni SPO3 Elmer Opsema, desk officer sa Barili Police Station dihang nahinabi sa Banat News kalit miabot ang mga gikatahapan ug mipusil sa biktima.
Usa ka taxi driver nga nahiagi sa lugar maoy nakadiskobre sa biktima nga nagbuy-od daplin sa dalan nga nagkadugo ang ulo ug dihang nakita niya nga nagginhawa pa kini gidala niya kini sa Barili District Hospital apan girekomendar sa mga doktor nga ibalhin sa Vicente Sotto Memorial Medical Center.
Ang kapulisan padayon pa sa ilang hot pursuit operation pagsikop sa mga responsable sa krimen ug sentro sa imbestigasyon mao ang personal o may labot sa trabaho ilabina sa mga utangan niining customer ang motibo. ( /EIM) - BANAT NEWS