CEBU, Philippines - Patay ang usa ka 31-anyos nga lalaki nga gituohang may deperensiya sa pangisip human kini matagak sa dump truck nga iyang gisakyang gipanag-iya sa kagmhanan sa lungsod sa Tabuelan samtang paingon unta kini maghatud og mga construction materials sa sitio Dalinsud, barangay Tigbawan lungsod sa Tabuelan alas 12:30 sa hapon niadtong Miyerkules.
Ang biktima nga namatay pipila ka gutlo tungod sa pagkabundak sa ulo gikan pagkatagak sa trak mao si Almar Bendebel, nagpuyo sa barangay Maravilla ug giingong dunay deperensiya sa pangisip.
Ang drayber sa dump truck nga iyang gisakyan mao si Norman Roilan,32, nga drayber sa lungsod.
Matud ni SPO1 Ramon Montecalvo sa Tabuelan Police Station dihang nahinabi sa Banat News, ang dump truck sa lungsod puno sa mga karga nga building materials paingong ihatud sa barangay Canluhangan alang sa rehabilitasyon sa barangay hall sa maong lugar.
Samtang nagbiyahe ang maong dump truck mikatkat ang biktima ug milingkod sa mga steel bars apan pag-abot sa maong lugar nasangit ang maong steel bars sa puno-an sa kahoy daplin sa karsada. Tungod niini nalabay ang biktima ug nag-una ang ulo nga mitugpa sa karsada. Ang drayber pagkasayod sa nahitabo boluntaryong mitahan sa iyang kaugalingon sa kapolisan apan gibuhian kagahapon human nakigsabot ang mga kabanay nga abagahon sa drayber ang gastos sa lubong. ( /EIM) - BANAT NEWS