CEBU, Philippines - Napildi ang pagkababaye sa usa ka 17 anyos nga dalagita human kini lugosa sa wala hiilhing kriminal kinsa sa samang higayon mikawat usab sa iyang cell phone didto sa barangay Dakuit dakbayan sa Bogo sa miaging gabii.
Giila lang sa ngalang EG, 17, molupyo sa barangay Bungtod sa maong lugar ang biktima. Sa pakighinabi sa Banat News sa hepe sa kapolisan sa syudad sa Bogo nga si Chief Insp. Ceferino Tabay Jr. kini mibutyag nga ang biktima nangita og kapalitan og load sa cell phone sa maong higayon.
Gidimalas kini kay nasirhan sa tindahan ug sa iyang pagpauli usa ka tawo nga dili niya kaila kalit nga miduol kaniya ug sa walay kukahadlok migakos ug mihawok kaniya.
Dayon gihikap ang tanang mga mahinungdanong bahin sa iyang lawas ilabi na ang pribadong parti niini.
Busa mikaratel og dagan ang biktima apan gigukod siya ug dihang naapsan giguyod siya ngadto sa kamaisan ug didto pahimusli ang iyang pagka-babaye.
Human matagbaw ang manlulugos, gidala pa ang cell phone sa biktima dayong layas niini ug gibiyaan ang dalagita sa kamaisan. ( /WC) (BANATNEWS)