2 sundalo, 6 driver positibo sa drugs

CEBU, Philippines - Duha ka mga sundalo sa Central Command-Armed Forces of the Philippines ang giingong positibo sa gipahigayong random drug test niadtong Lunes diha sa ilang kampo.

Samtang unom ka mga jeepney drivers ang nasakpan usab nga positibo sa ilegal nga drugas sa gihimong roadside random drug test nga gihimo sa Land Transportation Office-7.

Si Lieutenant Colonel Christopher Tampus, tigpamaba sa CentCom nagkanayon nga ang nahisgutang drug testing lakip kini sa AFP Security Sector Reform.

Apan ang CentCom nagdumili sa pagbutyag sa mga pangalan sa nahisgutang mga sundalo samtang gikompirma pa ang resulta sa eksaminasyon sa sample sa mga ihi niini nga gisumitir ngadto sa Philippine National Police Crime Laboratory-7 sa Camp Sotero Cabahug.

Mga 350 ka sundalo, civilian employees ug mga opisyal ang gipaubos sa random drug test.

“This is to clean the armed forces from illegal drugs due to reports nga some soldiers are using drugs,” matud ni Tampus.

Si Major General Jose Mabanta Jr. sa iyang bahin, nagkanayon nga dili sila mo-tolerate sa ilegal nga kalihukan ug taktakon nila ang duha kun makompirmar nga drug users kini.

Samtang sa gihimong roadside random drug test sa LTO-7 kagahapong adlawa diha sa Natalio Bacalso Ave. sa pipila ka minibus, jeepney ug taxi drivers unom kanila ang nagpositibo.

Si LTO Regional Director Raul Aguilos mibutyag sa Banat News nga 50 ka mga drayber ang gipailawom sa random drug test, upat kanila mga jeepney driver, usa ka taxi driver ug usa usab ka minibus driver.

Mipasidaan si Aguilos nga magpadayon ang kinalit nga drug testing sa mga drayber aron pagsigurong dili high sa illegal drugs ang mga maghatud og pasahero sa mga nagkadaiyang destinasyon.

Gibutyag usab niya nga tanang nahaunang nagpositibo sa ilegal drugs wala pa makakuha og balik sa ilang mga lisensya.

“Ang tanan nga nag-positive wala na gyud makakuha balik sa ilang license,” matud pa ni Aguilos sa iyang text.

Pasabot pa ni Aguilos nga ang kapin sa 200 ka mga draybers nga una na nilang nasikop wala na gyud makakuha pagbalik sa ilang lisensya.  - BANAT NEWS