CEBU, Philippines - Gitinguha sa Task Force Tabang (TFT) nga mapadala ang mga nakolektang hinabang nga ihatag ngadto sa mga nabiktima sa dakong pagbaha sa Luzon sa dili pa mahuman ang buwan sa Agosto.
Matud pa ni Timogen Arellano sa National Economic Development Authority (NEDA) 7 atol sa nahitabong Kapihan sa PIA nga padayon pa silang nanawat og mga donasyong cash o ba kaha bisan unsa nga nagagikan sa publiko.
Ilaha kining gi-repack aron mapadala ngadto sa Manila, ang TFT sa NEDA-7 maoy secretariat sa Regional Development Council-7 ug gisugdan ang pagpanawat sa hinabang niadtong miaging semana.
Si Arellano mihangyo pag-usab ngadto sa publiko sa pag-ambit sa ilang hinabang ngadto sa mga wala’y swerteng naapektahan sa dakong pagbaha bunga sa hanging habagat didto sa Metro Manila ug ang pag-igo sa wala’y puas nga pag-uwan.
Ang nag-unang mga gikinahanglan mao ang bottled water, mga pagkaon, choco bars, gatas alang sa mga bata, mga habol ug usab mga bisti nga mamahimo pang magamit.
Ang mga hinabang mahimong ihatud ngadto lamang sa Department of Social Welfare and Development (DSWD)7 nga bukas 24-oras; Cebu Provincial Capitol, Talisay City Hall ; Lapulapu City Hall ug usab tanang estasyonan sa pulis sa tibuok Central Visayas ug lakip na ang Cebu Chamber of Commerce and Industry.
Ang TFT gilangkoban sa nagkadaiyang ahensya sa gobiyerno sa rehiyon, Local Government Units (LGUs), ug usab pribadong sektor partikular na sa CCCI, Rotary Club of Cebu ug Philippine Asia Carrier (PSAC) nga maoy modala niini ngadto sa Manila.
Ang Department of Health (DOH) 7 ug DSWD 7 maoy mangulo sa pagpangolekta og mga hinabang samtang ang Philippine National Police (PNP), Armed Forces ug Central Command maoy magbantay sa seguridad. - BANAT NEWS