Fire Marshal gibalhin sa NCR
CEBU, Philippines - Gihulipan sugod kagahapong adlawa si Cebu City Fire Marshall Sr. Supt Aderson Comar ug gibalhin kini sa National Capital Region sa nasudnong lahugay nga gipatuman sa Bureau of Fire Protection (BFP).
Si Insp. Josephus Alburo, ang head executive assistant sa Regional Director mibutyag sa mga tigbalita nga ang lahugay gimando ni Secretary Jesse Robredo sa Department of Interior and Local Government.
Sa unang kamandoan, 13 ka mga opisyal lakip ni Cebu City Fire Marshall Aderson Comar ang naapil sa lahugay. Si Comar hulipan ni Chief Insp. William Tacaldo nga kanhi Dumaguete Fire Marshall ug ibutang si Comar nga Assistant Regional Director for Operations sa National Capital Region. Sa ikaduhang kamandoan 32 usab ka mga opisyal sa BFP sa pipila ka syudad ug munisipalidad ang gilahugay.
Si Tacaldo miangkong dako kaayo og kalainan ang Dumaguete City ug Cebu City kay highly urbanized kini.
“I only follow orders. Challenge sa akong part pero ako gyud nga buhaton ang tanan. I wish sad nga ang mga tawo mosuporta ug makontinto sa among serbisyo,” matud pa ni Tacaldo. “I have no choice as a man in uniform, we will follow orders,” matud pa usab ni Comar. Apan si Mayor Michael Rama kinsa nakauyon sa trabaho ni Comar miingon nga mopadala siya og suwat ngadto ni Robredo aron ipabilin si Comar dinhi.
(BANAT NEWS)
- Latest
- Trending
