CEBU, Philippines - Patay ang usa ka polis human gitabangan og dunggab sa mga estambay diha sa Zone 14, barangay Calaparan, Arevalo, Iloilo City kagahapon sa buntag.
Ang gipatay giilang si PO1 Amar Dixon , sakop sa Iloilo City Public Safety Company kinsa nakaangkon og unom ka samad dinunggaban sa iyang tiyan ug patay nang nadangat sa Iloilo Doctors’ Hospital.
Apan wala mamatay si Dixon nga walay nahimo, nakabawos kini pagpusil sa mga miatake kaniyang managparyente sila si Edgar Gascon, 21, ug Wilfredo Manar, 30, pulos residente sa maong dapit ug ni Joren Quinaguran, 27, lumad nga taga Pototan, Iloilo ug kasamtangang nagpuyo sa balay ni Manar. Ang tulo nalandig tanan sa St. Therese Hospital.
Base sa pasiunang report, nadunggan na lang ang butobuto sa armas ug nakit-ang nagdagan si Gascon nga nagkadugo sa walang sampot ug paa, samtang si Wilfredo may samad pinusilan usab sa walang kilid ug walang paa ingon man si Quinaguran napusilan sa walang paa.
“Apparently, there was no intention to kill. Gusto lang siguro ni PO1 Dixon na ma-disable ‘yung tatlo para hindi na siya saksakin,” pamahayag pa ni Senior Inspector Lea Peña, ang hepe sa Arevalo police station.
Base sa gihimong imbestigasyon si Dixon gikan sa balay sa mga ginikanan sa Delgado St., Iloilo City uban sa mga higala padulong sa gibantayang balay nga iya sa igsuon niining babaye diha sa maong barangay.
Sumala pa kaadlawon nang naabot ang grupo ni Dixon sa balay ug miuna og sulod ang duha ka kauban niini samtang si Dixon sa wala pa matinong rason nagpabilin kini sa dalan ug diha niini gikaengkwentro ang tulo. Gikatahong gipangkuhaan niini og hulagway sa iyang cellphone ang tulo. “We still don’t know if he was able to take pictures because his cellphone is missing,” matud pang Peña.
Sumala pa base sa testigo nga nasinta sila Gascon ug Manar ug gikomprontase si Dixon samtang si Quinaguran mipalayo apan may gikuptang kutsilyo ug misangpot ang hitabo nga gitabangan og sumbag ug dunggab sa tulo ang biktima. Bisan samaron midagan si Dixon sa balay sa classmate nga si PO2 Renante Guzman nga nagpuyo duol sa nahitaboan apan walay nangabli maong midagan kini sa gamay’ng agianan apan dead end diay kini apan tungod kay wala nay kadaganan diha na mibunot si Dixon sa iyang armas ug gipusil ang migukod nga tulo.
Si Guzman mibutyag nga wala sila makadungog sa pagpanuktok ni Dixon gikan sa 2nd floor apan nakurat siya sa butobuto sa armas maong mibarog siya ug miresponde apan nakit-an niyang nagbuy-od na si Dixon ug ang tulo niya ka silingan diha sa dalan, ang mga residente nay mitabang pagdala kanila sa tambalanan.
Sa pagresponde sa mga polis, wala na diha ang mga kutsilyo sa mga suspek ingon man ang armas, cellphone ug pitaka ni Dixon. (BANAT NEWS)