CEBU, Philippines - Dugang kasong kalapasan sa RA 6539 o Anti-Carnapping Act of 1972 ug kalapasan sa Batas Pambansa Bilang 43 mao unya ang ipasakang kaso ni Jovel Entote kinsa nasikop niadtong Martes tungod sa gikatahong kalambigitan niini sa carnapping didto sa Quezon City.
Lakip usab sa gitun-ang posibleng pasakaan og susamang kaso mao ang iyang asawang si Mary Anne nga nasikop usab niadtong Martes sumala pa sa legal counsel sa Highway Patrol Group-7 nga si Atty. Edwin Angay.
Si Angay mibutyag sa mga tigbalita kagahapon gitapok ang mga ebidensya ug dokumento kalabot sa maong kaso aron kini ilang mapasaka karong adlawa.
Si Entote gisikop niadtong Martes pinasikad sa warrant of arrest gikan sa korte sa Quezon City kalabot sa kasong Qualified Carnapping mahitungod sa insidente sa carnapping niadtong Abril 29, 2009 sa Quezon City diin ang drayber sa Toyota Hi-Ace Grandia nga adunay plakang ZPZ-463 gipatay ug gidala ang sakyanan.
Ang maong sakyanan na-recover niadtong Oktubre 28, 2011 sa Bacolod City ug ang nakapalit miisyu og affidavit nga kang Entote niya kini napalit ug lahi na ang plaka niini.
Ang HPG sa pagkasikop kang Entote may nakuhang mga plaka sa mga sakyanan nga gitaod sa laing mga sakyanan nga giingong diha sa ilang posesyon.
Ang HPG niadtong milabay’ng semana nakakuha og tulo ka sakyanan nga giingong gikan ni Entote, duha niini mga BMW ug usa ka Honda Jazz, ang usa ka BMW wala’y plaka samtang ang plaka sa usa iya sa nakarehistro sa usa ka Toyota Corolla Sedan nga iya sa taga Manila. Ang plaka usab sa Honda Jazz iya sa Hi-Ace Van.
Samtang wala tuguti kagahapon ang mga sakop sa media nga makahinabi ang magtiayon tungod kay wala ang ilang abogado (BANAT NEWS)