Pagka-miyembro ni Abellanosa sa scholarship committee kuwestiyonabli

CEBU, Philippines - Gibutyag ni Konsehal Edgardo Labella nga posibling may conflict of interest ang pagkabutang ni Konsehal Rodrigo Abellanosa isip usa mga miyembro sa scholarship program committee   sa konseho sa dakbayan.

Nasayran nga si Abellanosa maoy tag-iya sa Asian College of Technology (ACT) diin may mga scholar sa siyudad nga nag-eskwela sa maong tunghaan.

Gipadayag kini ni Labella human moduso ang pipila niya ka kauban sa konseho og ordinansa nga ipalakip si Abellanosa sa komitiba sa scholarship program. Giingong usa si Abellanosa sa mga miduso sa maong ordinansa nga malakip ang iyang kaugalingon sa komitiba.

Samtang si Konsehal Jose Daluz III supak usab sa pagkabutang ni Abellanosa gumikan kay adunay posibilidad nga ma-impluwensyahan ang mga polisiya sa maong programa ilabi na nga nanag-iya kini og tunghaan.

Ang komitiba sa scholarship program gilangkoban sa mayor, ang tsirman sa konseho nga naghupot sa committee on education, committee on social services, city treasurer, city administrator, Department of Education, Commission on Higher Education, ug ang Technical Education and Skills Development Authority.

Nasayran nga si Abellanosa maoy tsirman sa committee on social services busa misaysay kini nga kuwalipikado siya nga mahimong sakop sa komitiba ug giklaro usab niini nga temporaryo ra ang iyang posisyon sanglit anaa na siya sa katapusang termino sa iyang pagka-konsehal.    - BANAT NEWS