CEBU, Philippines - Agi og tubag sa dinaliang hinabang alang sa mga biktima sa pagbaha sa Metro Manila, ang Department of Social Welfare and Development (DSWD) 7 miabli sa ilang Donors' Desk sa ilang Field Office aron sa pagdawat og mga donasyon nga cash o bisan unsang material nga butang.
Ang DSWD 7 gitahasan sa pagdumala ug pakig-alayon sa paghikay, pagpanglista, pagdawat o paghipos lakip na ang pagpamutos sa mga managsamang hinabang nga pagkaon ug dili pagkaon nga mga butang.
Gawas niini gitahas usab sa maong ahensya ang pagkarga niini sa barko ug sa pagpanghatud niini ngadto sa mga dapit nga apektado sa maong katalagman.
Ang labing gikinahanglan karon sa mga butang nga angayang itabang ngadto sa mga nabiktima sa maong katalagman mao ang mga de lata nga pagkaon, bottled water, mga tambal, mga senina, underwear, habol, tuwalya, galamiton sa kusina,toilet ug hygeine kits.
Sa nasayran, ang walay puas nga pagbunok sa uwan maoy pabilo sa pagbaha ug lunop nga milubong sa nagkalainlaing lugar sa Metro Manila sulod na sa upat ka adlaw nga milabay nga nakapugos sa mga apektadong molupyo sa pagbakwit ngadto sa mas luwas nga lugar ug sa mga temporaryong evacuation center.
Ang Donors' Desk sa DSWD Field Office 7 nga modawat sa mga donasyon sa publiko nahimutang sa eskina sa mga dalan M.J Cuenco and Gen. Maxilum syudad sa Sugbo
Ang gitugyanan nga modawat sa maong mga donasyon mao si Lyn Marie Pino ang DSWD-7 Procurement Officer nga matawag sa telepono, 4129908 local 106. - BANAT NEWS