Mga opisyal sa senior sa Mandaue nanumpa

CEBU, Philippines - Ang mga opisyal sa Senior Citizens’ Association Inc., usa ka kahugpongan sa mga edaran sa dakbayan sa Mandaue misaad nga andam nilang suportahan ang tanang kalihukan sa kagamhanan sa lalawigan nga naghatag kanila og dugang mga benepisyo.

Kini human sila manumpa atubangan ni Governor Gwendolyn Garcia sa miaging Sabado didto sa Consuelo Village sa barangay Basak, sa maong dakbayan.

Kauban sa gobernador nga mipapanumpa sa mga opisyal sa maong kapunongan mao si Kongresista Pablo John Garcia sa ikatulong distrito sa lalawigan sa Sugbo.

Ang maong hugpong sa mga senior citizen nga may 400 ka  mga membro gipangunahan sa ilang presidente nga si Imay Arcenas.

Mitambong usab sa maong panumpa si Kapitan Vicente Dayanan sa barangay Basak.

Sa naasoy nga okasyon gisaysay ni Kongresista PJ Garcia kun giunsa niya pagpangga ang mga senior citizen sa iyang distrito ug ang iyang tinguha nga ipadayon niya ang tanang proyekto ug programa nga gipasiugdahan ni Gobernador Garcia. Samtang gipasabot sa gobernador nga gipangga niya pag-ayo ang mga edaran ug gusto niya nga magpadayon  kini sa pagsuporta kaniya ilabi na gilaraw niyang molansar sa pagka-senador sa umaabot nga election.

Gisaad usab sa gobernador nga andam siyang mohatag og building sa mga senior citizen sa Basak kun mangayo sila niini.

Apan dili lamang edipisyo kundi bisan sa ilang panginabuhi mipasalig siya nga andam siyang motabang niini kun mangayo sila.

Si Arcenas kinsa usa usab ka Theresian sama sa gobernador mapasalamaton kaayo kang Gobernador Garcia ug kang Cong. PJ Garcia tungod migahin sila og panahon alang kanilang taga Basak. (BANAT NEWS)