Police outpost sa Mananga ipabalik

CEBU, Philippines - Si Kapitan Manuel Cabriana sa barangay Tabunok, dakbayan sa Talisay mipadayag og kabalaka sa dakong kalagmitan nga modagsang   ang krimen sa sitio Mananga human mawagtang ang police outpost sa maong lugar upat na ka buwan ang nakalabay.

Ang sitio Mananga sakop sa barangay Tabunok diin magikan ang 80 porsyento sa tanang krimen nga mahitabo sa   maong barangay. Kasagaran sa maong krimen mao ang tulis sa mga pasahero sa PUJ ug pagpanglabni kay ang mga kawatan dali kaayo nga makatago sa ilawom sa tulay sa Mananga ug lisud kaayong madakpan. Sa milabay’ng buwan ang konseho sa barangay mipasar og resolusyon nga nag-awhag sa kapolisan sa pagpabalik sa maong police outpost apan hangtud karon way epekto.

Busa gitakda na usab nga mopasar karong adlawa   ang konseho sa Tabunok og mao gihapong resolusyon sa pagpamatuod nga gikinahanglan kaayo nila kini aron nga dili mapurhisyo ang mga   tawo nga moagi sa Mananga.

Samtang si Supt Eddie Recamara, hepe sa Talisay City Police Station mipasabot nga ang hinungdan nga giwagtang nila ang police outpost sa Mananga mao ang ka walay linya niini sa kuryente, telepono, tubig ug pansayan.

Hinuon matud niya nga bisan og walay outpost sa Mananga nagpahigayon sila matag karon ug unya og saturation drive ug pagpatrolya sa kadalanan. Si Recamara midugang nga adunay pito ka police nga ubos sa Field Training Program (FTP) nga naabot kagahapon sa TCPS ug ipaubos kini niya sa briefing tungod kay posibleng makauban kini sa mga saturation drive nga ipahigayon sa Mananga. (BANAT NEWS)