Duha gipamusil angol sa Talisay

CEBU, Philippines - Duha ka lalaki ang nalandig sa tambalanan human kini mapusila sa managlahing barangay sa dakbayan sa Talisay niadtong Biyernes sa hapon ug gabii.

Ang mga biktima mao sila si Josue Montefalcon, 45, nga taga sitio Kalubihan, barangay Tabunok   ug si Edgen Racaza, 23, nga taga sitio Tunga, barangay Tanke. Si Montefalcon gipusil sa alas 5:30 sa hapon , samtang si Racaza niana nang pagka-alas 7:30 sa gabii.

Si Montefalcon nasabak sa ubos nga bahin sa wala niyang tiyan dihang gipusil siya sa ilang silingan   nga si Danillo Atillo, 50, didto sa ilang lugar.

Sumala sa kapolisan si Montefalcon ug Atillo dugay nang nagkabangi apan bisan gihusay na nagpabilin gihapong nagdumot si Atillo ug gani giingong hubog kini dihang gipusil niini ang biktima.

Samtang si Racaza naglakaw sa karsada sa sitio Tunga dihang kalit lamang kini giluthang sa wala hiilhing kriminal nga nagsul-ob og bonnet. Nasabak kini   sa tuong bahin sa iyang nawong ug dali usab kining gihatod ngadto sa Vicente Sotto Memorial Medical Center (VSMMC) sa dakbayan sa Sugbo diin usab dad-a si Montefalcon.

Walay kasayuran ang kapolisan unsay hinungdan nganong gipusil ang biktima.

Ang kapolisan padayon pang nagpangita kang Atillo ug sa mipusil kang Racaza. – (BANAT NEWS)