CEBU, Philippines - Nakabsan sa kinabuhi ang 3 anyos nga batang lalaki human kini dasmagi sa usa ka motorsiklo didto sa barangay Fuente, lungsod sa Carmen niadtong Huwebes sa hapon.
Ang biktima giila sa ngalan nga si Vaynel Mar Bayon, 3, nga nagpuyo sa maong lugar.
Samtang ang nakadasmag nga motorsiklo gimaneho ni Antonio Barbas Jr. nga taga barangay Catmon Daan sa lungsod sa Catmon.
Si PO3 Roger Delan sa Carmen Police Station mibutyag sa Banat News nga nagpaingon sa dakbayan sa Sugbo ang motorsiklo gikan sa amihanan dihang kalit lang milabang sa karsada ang biktima.
Matud pa ni PO3 Delan nga gumikan sa kakusog nga dagan sa motorsiklo, wala na kini makontrolar sa drayber ug nasabak ang bata sa pangunahang ligid hinungdan nga gumikan sa kakusog, milupad kini ug sa pagtugpa niini nabunal ang ulo sa sementadong karsada nga maoy hinungdan sa hinanali niyang kamatayon.
Gisuwayan og hatud sa mga tagtungod ang biktima ngadto sa Danao City District Hospital diin kini ideklarar nga dead on arrival.
Samtang ang drayber mitahan usab sa iyang kaugalingon ngadto sa kapolisan ug sa pagkakaron nagtingkagol na sa prisohan samtang nagpaabot sa tukmang kiha nga ipasaka batok kaniya. Gidudahan usab sa kapolisan nga nataligam-an sa mga ginikanan ang biktima. - BANAT NEWS