CEBU, Philippines - Gitulis sa nagbinugtong nga armadong lalaking nagmotor ang upat ka mga babayeng sakay og Starex Van diha sa dalan Almendras sa barangay Poblacion, dakbayan sa Danao alas-12 pasado ang takna sa miaging tungang gabii.
Ang biktima mao sila si Brenda Dagatan, 54 , usa ka retiradong accountant, Michelle Calzada, 28, nga restaurant manager, Risamea Calzada, 20, dalaga ug Bresbetince Calzada, 25, nga pulos nagpuyo sa maong dapit.
Matud pa ni PO2 Rucelo Campo sa kapolisan sa maong dakbayan nga ang mga biktima gikan pa sa dakbayan sa Sugbo ug sakay sa ilang pribadong sakyanan padulong na pauli.
Apan pag-abot sa maong dapit kalit lang mitumaw ang wala mailhing lalaki nga nagsuot og helmet sa nawong ug gitionan og armas ang mga biktima dayong deklarar og tulis ug gikuha ang mga alahas, cellphone ug kwarta sa upat.
Ang mga biktima igo na lang misumbong sa kapolisan human moikyas ang suspek. - BANAT NEWS