CEBU, Philippines - Patay na nga napalgan sa anak ang iyang amahan nga nagbitay sulod sa ilang balay sa sitio Cabancalan, barangay Bulacao, dakbayan sa Sugbo kagahapon sa kaadlawon.
Ang naghikog nailhan nga si Leonidez Tabura Padigos, 52, usa ka karpentero ug molupyo sa nahisgutang lugar.
Sa pasiunang imbestigasyon sa kapolisan nasayran nga ang biktima nakig- inom pa sa iyang mga anak nga sila si Junidas ug Ariel sa gawas sa ilang balay sa wala pa kini magpakamatay.
Human matagbaw sa ilang inom misulod kini sa lawak ug natulog.
Apan nianang pasado alas 4:00 sa kaadlawon si John Loyd, ang kamanghorang anak niini mibangon ug nakurat kini dihang maoy misugat sa iyang mga mata ang wala nay kinabuhi nilang amahan nga nagbitay sa pisi kansang tumoy gigaid sa sagbayan sa ilang balay.
Gisangpit dayon niini ang iyang inahan nga si Felicisima ug mitawag dayon sila og polis.
Gibutyag ni Felicisima sa kapolisan nga makadaghan nang misuway og hikog ang iyang bana apan napakgang nila kini ug kagahapon sa kaadlawon nadayonan na gyud kini kay walay nakabantay sa iyang gihimo.
Ang kapolisan mopahigayon pa og dugang pakisusi sa maong hitabo. (BANAT NEWS)