CEBU, Philippines - Gipadayag ni Bise Gobernador Agnes Magpale ang kaandam niini pag-asumir isip acting governor sa Sugbu sa higayon nga ipatuman ang preventive suspension batok ni Gobernador Gwendolyn Garcia nunot sa giatubang niining mga kasong graft sa Sandiganbayan.
Ang maong kaso may labot kini sa gihulagway nga anomalya sa pagpalit sa Kapitolyo sa Balili property nga naglubog sa dagat diha sa siyudad sa Naga, laing pito ka opisyal sa lalawigan ang apil sa maong kaso.
Gibutyag ni Magpale atol sa interbyu sa DyDD wala siya’y mahimo gawas sa pag-asumir kun kini mahitabo kini tungod kay mao man kini ang nalatid sa balaod.
Si Magpale nga maoy mamahimong runningmate ni Liberal Party (LP) gubernatorial bet Hilario ‘Junjun’ Davide III mipasalig og patas unya nga pagtagad sa mga lungsod ug dakbayan nga walay bulok pamolitika masakop man sa LP o One Cebu Party sa mga Garcia. Si Magpale sakop sa Bakud Party ni Danao City vice mayor Ramonito Durano III nga nakig-alyansa sa LP ni Presidente Benigno Aquino III.
Giklaro usab ni Magpale nga wala siya mahulga sa bahad sa iyang duha ka ig-agaw nga sila si Danao City mayor Ramon ‘Boy’ Durano ug Don Durano nga nanganting dili mosuporta sa iyang kandidatura. Ang igsuon ni Garcia nga si Kongresista Pablo John Garcia sa ikatulong distrito maoy gituboy nga kandidato sa One Cebu hulip sa gobernador nga naa na sa katapusang termino. (BANAT NEWS)