Gumikan sa libak ginang natigbasan ug nalubaan

CEBU, Philippines - Kritikal ang kahimtang sa usa ka ginang nga gitigbas ug gidunggab sa gikalalis niyang lalaki gumikan sa giingong pagpanglibak didto sa Sityo Pajo-1 barangay Pajo, lungsod sa Daanbantayan niadtong Domingo sa alas 4:20 sa hapon.

Ang biktima mao si Corazon Sontousidad, 42, minyo, nga taga Sitio Pajo-Norte   sa maong barangay, samtang ang suspek mao si Sanito Almeda, hingkod, minyo nga taga Pajo Proper sa mao usab nga barangay.

Si PO2 George Banatasa sa Daanbantayan Police Station mibutyag sa Banat News nga ang biktima ug ang suspek nagkaabot sa katapusang pangadye sa ilang silingan.

Matud pa tungod sa libak ug mga tabi-tabi nagkalalis ang duha hinungdan nga nasagpaan sa suspek ang biktima busa nagkadugo ang ngabil niini.

Unya kalma ra kaayong mipauli ang suspek sa ilang balay apan gisundan kini sa biktima nga nagpunay og yawit bahin sa nahitabo.

Didto sa balay gikuha sa suspek ang iyang sundang ug sa paggawas niini, way pugong-pugong nga gitigbas   ang biktima.

Human tigbasa giligid og duslak sa suspek ang lawas sa biktima busa nabulit sa tinigbasan ug dinunggaban ang nagka- lain laing bahin sa lawas ang naulahi.

Ang biktima gihatud dayun ngadto sa Daanbantayan District hospital apan tungod sa kadelikado sa iyang   kahimtang gilahos kini sa tambalanan sa dakbayan sa Sugbo.

Samtang ang suspek nga misibat human sa hitabo padayon pang gipangita sa kapulisan sa paghimo ning balita. (BANAT NEWS)