CEBU, Philippines - Ang kapolisan sa dakbayan sa Naga milusad og imbistigasyon sa paghikog sa usa ka 13-anyos nga dalagita nga giubanan og mga isyu bahin sa pagpanglugos nga wala konpirmaha sa kapolisan sa maong dakbayan.
Si Supt Eduardo Saavedra, hepe sa City Of Naga Police Station mibutyag sa Banat News kagahapon nga niadto pang Hulyo 15, 2012 giingong naghikog ang maong dalagita, apan Hulyo 20 na sa maong tuig kining gisumbong sa inahan sa ilang buhatan.
Ang kapolisan naintriga sa mga tabi-tabi nga matud pa gimolestiya kuno sa kaugalingon niyang amahan ang maong bata apan wala sila motuo niini.
Si Saavedra nagkanayon nga wala mosulti ang inahan niini sa hinungdan nga nagpaluyo sa kamatayon sa ilang anak.
Gisuta pa usab sa kapolisan kun unsay gigamit sa paghikog sa maong batan-on, nagbitay ba sa pisi, nag-inom ba og hilo, o kaha migamit og armas. (BANAT NEWS)