Pekeng mga Viagra nasakmit, 2 sikop
CEBU, Philippines - Duha ka mga lalaki ang gidakop human masakping namaligya og mga pekeng pampagana sa pakighilawas diha sa Fuente Osmeña Rotunda dakbayan sa Sugbo pasado alas-10 sa miaging gabii.
Ang mga nasikop mao silang Jamil Gaviola, 42, ug Alvin Amajad Jaji, 27, pulos taga barangay Alaska, Mambaling ning dakbayan kinsa nakuhaan og mga gidudahang pekeng Viagra.
Sa pakighinabi sa Banat News ni PO1 Evan Burlaos, sa Fuente Police nakadawat sila og impormasyong dunay namaligya og Viagra ug uban pang tabletas nga giingong pampagana sa pakighilawas sa maong dapit.
Apan ang nakapahibulong kanila mao nga kini gibaligyang barato ug diha ra sa aseras hinungdan nga ilaha kining gisusi ug human makompirmar gidakop ang duha.
Nagduda ang kapolisan nga peke ang maong mga Viagra ug posibleng makadaot sa panglawas sa makainom niini.
Gawas sa walo ka box nga Viagra, dugang unom ka box sa tabletas nga ginganlan og Chalice; usa ka box sa Ant; ug tulo ka botelya sa Tadalapil ang nasakmit gikan sa duha.
Butyag pa ni Burlaos nga ang kada usa ka box nagkantidad lang og 300 pesos. Ang duha gikatakdang pasakaan og kaso tungod sa pagpamaligya og pekeng tambal kun kini mamatud-an sa laboratory test. (BANAT NEWS)
- Latest
- Trending
