CEBU, Philippines - Nabuslot ang dughan sa usa ka tawo human kini pusila sa iyang kaatraso nga silingan didto sa sitio Patag sa barangay Malayag, dakbayan sa Danao sa miaging gabii.
Ang biktima mao si Jeric Rodriguez, 25, ulitawo, samtang ang suspetsado mao usab si Roger Mariquit Doncelio alyas Agaw-Agaw, 36 , minyo, nga pulos nagpuyo sa maong dapit.
Si PO2 Ruselo Campo sa kapolisan sa maong dakbayan nga nahinabi sa Banat News miingon nga nagbarog lang ang biktima sa gawas sa ilang balay dihang kalit lang kining gipusil sa suspek gamit ang armas de fuego nga wala pa matino ang kalibre.
Human mahagba ang biktima sa yuta, gibiyaan kini sa suspetsado kinsa nagdali nga miikyas gikan sa maong dapit.
Gihatud dayon sa mga tagtungod ang biktima ngadto sa Danao District Hospital apan gibalhin lang usab dayon kini ngadto sa Vicente Sotto Memorial Medical Center sa dakbayan sa Sugbo.
Hinuon sumala pa ni PO2 Campo nga sa gilusad nilang follow-up operation nadakpan nila ang maong suspetsado ug karon gibalhog na kini sa bilanggoan.
Gitataw niya nga ang karaang panagbingkil sa managsilingan maoy usa sa nag-unang hinungdan sa maong pagpamusil. - BANAT NEWS