CEBU, Philippines - Nagsugwak ang bugas sa mga bodega sa National Food Authority (NFA) dinhi sa lalawigan apan wa pay siguro kun mahinayon ba gyud ang bahad sa kagamhanan nga dili na kini mo-import og bugas sugod karong sunod tuig.
Mao kini gipatin-aw ni NFA Cebu Provincial Manager Nestor Rey Alcoseba atol sa AGIO Forum nga gipahigayon didto sa buhatan sa PIA nga gipalanog usab sa DYMR kagahapon sa buntag.
Matud pa ni Alcoseba nga abunda kaayo ang Sugbo karon sa bugas tungod kay sentro kini sa negosyo diin ania ibubo sa mga negosyante og bugas ang ilang mga baligya.
Sa pagkatinuod matud pa ni Alcoseba, ang produksyon sa humay dinhi sa lalawigan kuwang kaayo sa konsumo nga gikinahanglan sa populasyon sa mga Sugboanon.
Dili lamang ang Sugbo kundi bisan ang Bohol, Negros Oriental, ug Siquijor tungod kay bisan may mga humayan dinhi apan kuwang gihapon ang produksyon niini kun itandi sa konsumohon sa katawhan.
Sa bahin sa gilaraw sa goberno nga dili na mangompra og bugas humay gikan sa gawas karong sunod tuig, si Alcoseba naglisud sa pagkompirmar niini.
Hinuon nasuta niya nga sa pagkakaron mikibra gyud ang gidaghanon sa bugas nga gikompra sa nasud gikan sa Vietnam, ug uban pang nasud sa gawas kay niining tuiga mikabat na lang og 500 mil metriko toniladas ang importasyon sa bugas.
Apan sa maong gidaghanon 200 mil metriko toniladas ang komprada sa goberno, samtang ang 300 mil metriko toniladas iya sa pribadong sektor. (BANAT NEWS)