CEBU, Philippines - Kritikal ang kahimtang sa usa ka negosyante og isda human kini pusila sa usa ka drayber sa habal- habal didto sa Poblacion, lungsod sa Barili kagahapon sa alas 2:30 sa kaadlawon.
Ang biktima mao si Erwin Sapanta, 32, minyo, ug negosyante og isda sulod sa merkado publiko sa Barili
Samtang ang suspek mao si Wilmer Napoles, hingkod, minyo, nga taga barangay Campangga sa maong lungsod
Si SPO3 Elmer Opsema sa Barili Police Station mibutyag sa Banat News nga ang biktima nagpaabot sa mga isda nga iyang komprahon nga nagbarug- barug sa gawas sa usa ka videokihan dihang kalit lang miabot ang suspek ug mideretso og pusil kaniya.
Bisan naigo sa ubos nga bahin sa tiyan ang biktima naningkamot pa sa pagdagan hangtud nga nakaabot kini sa balay sa iyang inahan sa Sitio Gemelina, Poblacion diin didto nakapangayo og tabang.
Samtang gihatud ngadto sa hospital ang biktima, nakasibat usab dayon ang suspetsado ang maoy gipangita karon sa kapolisan.
May pagtuo ang kapolisan nga panagdumot ang hinungdan sa maong pagpamusil. (BANAT NEWS)