Call center agent natulisa'g P38 mil

MANILA, Philippines - Mikabat sa P38, 000 nga salapi, uban sa mga alahas ug cellphone sa usa ka call center agent ang nasakiyo sa tulo ka tawo nga mitulis niini didto sa barangay Pajac, dakbayan sa Lapulapu sa miaging gabii.

Ang biktima mao si Marvin dela Serna Anticamara, 23, nga taga sitio Abuno sa barangay Pajac sa maong dakbayan

Si PO2 Luel Barredo sa kapolisan sa Theft and Robbery Section sa kapolisan sa Lapulapu City Police Office (LLCP0) nga nahinabi sa Banat News miingon nga gikan ang biktima sa barangay Poblacion ug nag-inusara kining pasahero sa traysikol.

Pag-abot niini sa ngitngit nga bahin sa barangay Pajac, may mipara nga tulo ka wala hiilhing pasahero apan imbis molingkod sa lingkoranan milanit kini sa ilang armas ug gition ngadto sa biktima uban sa pahibawo nga tulis.

Usa sa maong mga tulisan maoy misakmit sa bag sa biktima nga gisudlan sa salapi.

Napakyas usab ang biktima sa pagkuha sa plate number sa traysikol nga gisakyan sa mga tulisan nga mibiya kaniya human siya himulboli sa kuwarta ug mga alahas. Si PO2 Barredo miingon nga wala usab modangop sa ilang buhatan ang drayber sa traysikol nga giluwanan sa biktima nga maoy nakapatumaw sa ilang katahap nga kakonsabo kini sa mga tulisan. (BANAT NEWS)