CEBU, Philippines - Sa pagsaulog sa Disaster Prevention Month niining buwana ang kabomberohan uban sa nagkalainlaing departamento sa kagamhanan sa Talisay magpahigayon og mga seminar sa mga barangay nga kanunay’ng duawon sa katalagman.
Si Talisay City Fire Marshal Fernando Vondrad Dublois mibutyag nga mao kini usa sa mga kalihukan sa pagsaulog sa disaster month sa dakbayan.
Iyang giila ang mga disaster prone barangay sa Talisay nga mao ang Dumlog, Lawaan III, Lagtang ug Cansojong, ug uban pang mga lugar nga duol sa sapa sa Mananga ug kadagatan.
Ang mga residente sa maong mga lugar edukahon bahin sa pagpangandam sa mga kasong emerhensiya aron malikayan ang mga disgrasya.
Mabantayan usab nila nga matag bundak sa kusog nga uwan adunay mga lugar sa Talisay nga magbaha, busa ang kabomberohan may mga suction pumps nga maoy mosuyop dayon sa tubig sa baha.
Sa mga emerhensiya nga panghitabo aduna sila’y giandam nga mga emergency lights nga gamiton sa pag-iwag taliwala sa kangit-ngit sa lugar nga masugamak sa katalagman.
Ang Talisay Rescue Emergency Action Team (TREAT) andam usab kanunay ug gani aduna sila’y duha ka ambulansiya nga magamit sa panahon nga may mga dugoong hitabo aron ihatod sa tambalanan.
Apan gibutyag ni Dublois nga nagkinahanglang ipaayo nila ang uban nilang ekipo aron magamit gayud kining epektibo sa panahon sa mga katalagaman sama sa suction pump, flash lights, ug mga rescue equipment nga karon daan na kaayo.
(BANAT NEWS)