CEBU, Philippines - Gibati og dakong garbo ang kagamhanan sa lalawigan sa Sugbo sa pagkapili sa Kawasan Falls sa lungsod sa Badian isip One of the Most Beautiful Waterfalls in the World sumala sa Travel Land Leisure.com.
Matud pa ni Governor Gwendolyn Garcia nga ang maong pasidungog magpasabot nga dugang mga turista ang gipaabot nga mobisita sa Kawasan Falls.
Sigun pa sa gobernador nga kini nagmatuod lamang nga nindot gayud ang nahisgutang busay nga nakapadani sa mga lokal ug langyaw nga mga turista Nakaingon ang gobernador nga nagbunga na gyud ang mga maayong tinguha sa kagamhanan sa lalawigan sa Sugbo nga mapreserbar ang mga natural nga kabtangan sa lalawigan sanglit ang maong pasidungog nakuha bisan og wala sila mangolekta og mga pagdayeg gikan sa mga tigpaniid. Gani iyang gikalipay ang nahisgutang kalambuan ug mipasabot sa kasibo sa iyang desisyon kaniadto sa pagpaguba sa mga illegal structures nga gipanukod sa palibot sa Kawasan falls.
Kahinumdoman nga nailhan pag-ayo ang mga tourist attraction sa lalawigan sa Sugbo nunot sa programa ni senatoriable governor Garcia nga Suroy- Suroy Sugbo. (BANAT NEWS)